Susimaparibbājakasutta

sn12.70:4.1 Tena kho pana samayena sambahulehi bhikkhūhi bhagavato santike aññā byākatā hoti:

sn12.70:4.2 “khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyāti pajānāmā”ti.

sn12.70:4.3 Assosi kho āyasmā susimo:

sn12.70:4.4 “sambahulehi kira bhikkhūhi bhagavato santike aññā byākatā:

sn12.70:4.5 ‘khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāmā”ti.

sn12.70:4.6 Atha kho āyasmā susimo yena te bhikkhū tenupasaṅkami; upasaṅkamitvā tehi bhikkhūhi saddhiṁ sammodi.

sn12.70:4.7 Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho āyasmā susimo te bhikkhū etadavoca:

sn12.70:4.8 “saccaṁ kirāyasmantehi bhagavato santike aññā byākatā:

sn12.70:4.9 ‘khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāmā”ti?

sn12.70:4.10 “Evamāvuso”ti.