sn12.63:6.1 Kathañca, bhikkhave, viññāṇāhāro daṭṭhabbo?
BAGIAN 6
sn12.63:6.2 Seyyathāpi, bhikkhave, coraṁ āgucāriṁ gahetvā rañño dasseyyuṁ:
sn12.63:6.3 ‘ayaṁ te, deva, coro āgucārī, imassa yaṁ icchasi taṁ daṇḍaṁ paṇehī’ti.
sn12.63:6.4 Tamenaṁ rājā evaṁ vadeyya:
sn12.63:6.5 ‘gacchatha, bho, imaṁ purisaṁ pubbaṇhasamayaṁ sattisatena hanathā’ti.
sn12.63:6.6 Tamenaṁ pubbaṇhasamayaṁ sattisatena haneyyuṁ.
sn12.63:6.7 Atha rājā majjhanhikasamayaṁ evaṁ vadeyya:
sn12.63:6.8 ‘ambho, kathaṁ so puriso’ti?
sn12.63:6.9 ‘Tatheva, deva, jīvatī’ti.
sn12.63:6.10 Tamenaṁ rājā evaṁ vadeyya:
sn12.63:6.11 ‘gacchatha, bho, taṁ purisaṁ majjhanhikasamayaṁ sattisatena hanathā’ti.
sn12.63:6.12 Tamenaṁ majjhanhikasamayaṁ sattisatena haneyyuṁ.
sn12.63:6.13 Atha rājā sāyanhasamayaṁ evaṁ vadeyya:
sn12.63:6.14 ‘ambho, kathaṁ so puriso’ti?
sn12.63:6.15 ‘Tatheva, deva, jīvatī’ti.
sn12.63:6.16 Tamenaṁ rājā evaṁ vadeyya:
sn12.63:6.17 ‘gacchatha, bho, taṁ purisaṁ sāyanhasamayaṁ sattisatena hanathā’ti.
sn12.63:6.18 Tamenaṁ sāyanhasamayaṁ sattisatena haneyyuṁ.
sn12.63:6.19 Taṁ kiṁ maññatha, bhikkhave,
sn12.63:6.20 api nu so puriso divasaṁ tīhi sattisatehi haññamāno tatonidānaṁ dukkhaṁ domanassaṁ paṭisaṁvediyethā”ti?
sn12.63:6.21 “Ekissāpi, bhante, sattiyā haññamāno tatonidānaṁ dukkhaṁ domanassaṁ paṭisaṁvediyetha;
sn12.63:6.22 ko pana vādo tīhi sattisatehi haññamāno”ti.
sn12.63:6.23 “Evameva khvāhaṁ, bhikkhave, viññāṇāhāro daṭṭhabboti vadāmi.
sn12.63:6.24 Viññāṇe, bhikkhave, āhāre pariññāte nāmarūpaṁ pariññātaṁ hoti, nāmarūpe pariññāte ariyasāvakassa natthi kiñci uttarikaraṇīyanti vadāmī”ti.
sn12.63:6.25 Tatiyaṁ.