Kaḷārasutta

sn12.32:6.1 Atha kho bhagavā aññataraṁ bhikkhuṁ āmantesi:

sn12.32:6.2 “ehi tvaṁ, bhikkhu, mama vacanena sāriputtaṁ āmantehi:

sn12.32:6.3 ‘satthā taṁ, āvuso sāriputta, āmantetī’”ti.

sn12.32:6.4 “Evaṁ, bhante”ti kho so bhikkhu bhagavato paṭissutvā yenāyasmā sāriputto tenupasaṅkami; upasaṅkamitvā āyasmantaṁ sāriputtaṁ etadavoca:

sn12.32:6.5 “satthā taṁ, āvuso sāriputta, āmantetī”ti.

sn12.32:6.6 “Evaṁ, āvuso”ti kho āyasmā sāriputto tassa bhikkhuno paṭissutvā yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinnaṁ kho āyasmantaṁ sāriputtaṁ bhagavā etadavoca:

sn12.32:6.7 “saccaṁ kira tayā, sāriputta, aññā byākatā:

sn12.32:6.8 ‘khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāmī”ti?

sn12.32:6.9 “Na kho, bhante, etehi padehi etehi byañjanehi attho vutto”ti.

sn12.32:6.10 “Yena kenacipi, sāriputta, pariyāyena kulaputto aññaṁ byākaroti, atha kho byākataṁ byākatato daṭṭhabban”ti.

sn12.32:6.11 “Nanu ahampi, bhante, evaṁ vadāmi:

sn12.32:6.12 ‘na kho, bhante, etehi padehi etehi byañjanehi attho vutto’”ti.