mn86:5.1 Atha kho coro aṅgulimālo asicammaṁ gahetvā dhanukalāpaṁ sannayhitvā bhagavantaṁ piṭṭhito piṭṭhito anubandhi.
BAGIAN 5
mn86:5.2 Atha kho bhagavā tathārūpaṁ iddhābhisaṅkhāraṁ abhisaṅkhāsi yathā coro aṅgulimālo bhagavantaṁ pakatiyā gacchantaṁ sabbathāmena gacchanto na sakkoti sampāpuṇituṁ.
mn86:5.3 Atha kho corassa aṅgulimālassa etadahosi:
mn86:5.4 “acchariyaṁ vata bho, abbhutaṁ vata bho.
mn86:5.5 Ahañhi pubbe hatthimpi dhāvantaṁ anupatitvā gaṇhāmi, assampi dhāvantaṁ anupatitvā gaṇhāmi, rathampi dhāvantaṁ anupatitvā gaṇhāmi, migampi dhāvantaṁ anupatitvā gaṇhāmi;
mn86:5.6 atha ca panāhaṁ imaṁ samaṇaṁ pakatiyā gacchantaṁ sabbathāmena gacchanto na sakkomi sampāpuṇitun”ti.
mn86:5.7 Ṭhitova bhagavantaṁ etadavoca:
mn86:5.8 “tiṭṭha, tiṭṭha, samaṇā”ti.
mn86:5.9 “Ṭhito ahaṁ, aṅgulimāla, tvañca tiṭṭhā”ti.
mn86:5.10 Atha kho corassa aṅgulimālassa etadahosi:
mn86:5.11 “ime kho samaṇā sakyaputtiyā saccavādino saccapaṭiññā.
mn86:5.12 Atha panāyaṁ samaṇo gacchaṁ yevāha:
mn86:5.13 ‘ṭhito ahaṁ, aṅgulimāla, tvañca tiṭṭhā’ti.
mn86:5.14 Yannūnāhaṁ imaṁ samaṇaṁ puccheyyan”ti.