Māgaṇḍiyasutta

mn75:22.1 “Evaṁ pasanno ahaṁ bhoto gotamassa.

mn75:22.2 Pahoti me bhavaṁ gotamo tathā dhammaṁ desetuṁ yathāhaṁ ārogyaṁ jāneyyaṁ, nibbānaṁ passeyyan”ti.

mn75:22.3 “Seyyathāpi, māgaṇḍiya, jaccandho puriso;

mn75:22.4 so na passeyya kaṇhasukkāni rūpāni, na passeyya nīlakāni rūpāni, na passeyya pītakāni rūpāni, na passeyya lohitakāni rūpāni, na passeyya mañjiṭṭhakāni rūpāni, na passeyya samavisamaṁ, na passeyya tārakarūpāni, na passeyya candimasūriye.

mn75:22.5 Tassa mittāmaccā ñātisālohitā bhisakkaṁ sallakattaṁ upaṭṭhāpeyyuṁ.

mn75:22.6 Tassa so bhisakko sallakatto bhesajjaṁ kareyya.

mn75:22.7 So taṁ bhesajjaṁ āgamma na cakkhūni uppādeyya, na cakkhūni visodheyya.

mn75:22.8 Taṁ kiṁ maññasi, māgaṇḍiya,

mn75:22.9 nanu so vejjo yāvadeva kilamathassa vighātassa bhāgī assā”ti?

mn75:22.10 “Evaṁ, bho gotama”.

mn75:22.11 “Evameva kho, māgaṇḍiya, ahañce te dhammaṁ deseyyaṁ:

mn75:22.12 ‘idantaṁ ārogyaṁ, idantaṁ nibbānan’ti, so tvaṁ ārogyaṁ na jāneyyāsi, nibbānaṁ na passeyyāsi.

mn75:22.13 So mamassa kilamatho, sā mamassa vihesā”ti.