Māgaṇḍiyasutta

mn75:21.1 “Evameva kho, māgaṇḍiya, aññatitthiyā paribbājakā andhā acakkhukā ajānantā ārogyaṁ, apassantā nibbānaṁ, atha ca panimaṁ gāthaṁ bhāsanti:

mn75:21.2 ‘ārogyaparamā lābhā, nibbānaṁ paramaṁ sukhan’ti.

mn75:21.3 Pubbakehesā, māgaṇḍiya, arahantehi sammāsambuddhehi gāthā bhāsitā:

mn75:21.4 ‘Ārogyaparamā lābhā,

mn75:21.5 nibbānaṁ paramaṁ sukhaṁ;

mn75:21.6 Aṭṭhaṅgiko ca maggānaṁ,

mn75:21.7 khemaṁ amatagāminan’ti.

mn75:21.8 Sā etarahi anupubbena puthujjanagāthā.

mn75:21.9 Ayaṁ kho pana, māgaṇḍiya, kāyo rogabhūto gaṇḍabhūto sallabhūto aghabhūto ābādhabhūto, so tvaṁ imaṁ kāyaṁ rogabhūtaṁ gaṇḍabhūtaṁ sallabhūtaṁ aghabhūtaṁ ābādhabhūtaṁ:

mn75:21.10 ‘idantaṁ, bho gotama, ārogyaṁ, idantaṁ nibbānan’ti vadesi.

mn75:21.11 Tañhi te, māgaṇḍiya, ariyaṁ cakkhuṁ natthi yena tvaṁ ariyena cakkhunā ārogyaṁ jāneyyāsi, nibbānaṁ passeyyāsī”ti.