mn62:14.1 Āposamaṁ, rāhula, bhāvanaṁ bhāvehi.
BAGIAN 14
mn62:14.2 Āposamañhi te, rāhula, bhāvanaṁ bhāvayato uppannā manāpāmanāpā phassā cittaṁ na pariyādāya ṭhassanti.
mn62:14.3 Seyyathāpi, rāhula, āpasmiṁ sucimpi dhovanti, asucimpi dhovanti, gūthagatampi dhovanti, muttagatampi dhovanti, kheḷagatampi dhovanti, pubbagatampi dhovanti, lohitagatampi dhovanti, na ca tena āpo aṭṭīyati vā harāyati vā jigucchati vā;
mn62:14.4 evameva kho tvaṁ, rāhula, āposamaṁ bhāvanaṁ bhāvehi.
mn62:14.5 Āposamañhi te, rāhula, bhāvanaṁ bhāvayato uppannā manāpāmanāpā phassā cittaṁ na pariyādāya ṭhassanti.