mn129:28.1 Yasmā ca kho, bhikkhave, paṇḍito sucintitacintī ca hoti subhāsitabhāsī ca sukatakammakārī ca tasmā naṁ paṇḍitā jānanti:
BAGIAN 28
mn129:28.2 ‘paṇḍito ayaṁ bhavaṁ sappuriso’ti.
mn129:28.3 Sa kho so, bhikkhave, paṇḍito tividhaṁ diṭṭheva dhamme sukhaṁ somanassaṁ paṭisaṁvedeti.
mn129:28.4 Sace, bhikkhave, paṇḍito sabhāyaṁ vā nisinno hoti, rathikāya vā nisinno hoti, siṅghāṭake vā nisinno hoti;
mn129:28.5 tatra ce jano tajjaṁ tassāruppaṁ kathaṁ manteti.
mn129:28.6 Sace, bhikkhave, paṇḍito pāṇātipātā paṭivirato hoti, adinnādānā paṭivirato hoti, kāmesumicchācārā paṭivirato hoti, musāvādā paṭivirato hoti, surāmerayamajjappamādaṭṭhānā paṭivirato hoti;
mn129:28.7 tatra, bhikkhave, paṇḍitassa evaṁ hoti:
mn129:28.8 ‘yaṁ kho jano tajjaṁ tassāruppaṁ kathaṁ manteti;
mn129:28.9 saṁvijjanteva te dhammā mayi, ahañca tesu dhammesu sandissāmī’ti.
mn129:28.10 Idaṁ, bhikkhave, paṇḍito paṭhamaṁ diṭṭheva dhamme sukhaṁ somanassaṁ paṭisaṁvedeti.