3.9. Vipassanākathā

ps3.9:13.1 Pañcakkhandhe aghato passanto anulomikaṁ khantiṁ paṭilabhati.

ps3.9:13.2 Pañcannaṁ khandhānaṁ nirodho anagho nibbānanti passanto sammattaniyāmaṁ okkamati.

ps3.9:13.3 Pañcakkhandhe ābādhato passanto anulomikaṁ khantiṁ paṭilabhati.

ps3.9:13.4 Pañcannaṁ khandhānaṁ nirodho anābādhaṁ nibbānanti passanto sammattaniyāmaṁ okkamati.

ps3.9:13.5 Pañcakkhandhe parato passanto anulomikaṁ khantiṁ paṭilabhati.

ps3.9:13.6 Pañcannaṁ khandhānaṁ nirodho aparappaccayaṁ nibbānanti passanto sammattaniyāmaṁ okkamati.

ps3.9:13.7 Pañcakkhandhe palokato passanto anulomikaṁ khantiṁ paṭilabhati.

ps3.9:13.8 Pañcannaṁ khandhānaṁ nirodho apalokadhammo nibbānanti passanto sammattaniyāmaṁ okkamati.

ps3.9:13.9 Pañcakkhandhe ītito passanto anulomikaṁ khantiṁ paṭilabhati.

ps3.9:13.10 Pañcannaṁ khandhānaṁ nirodho anītikaṁ nibbānanti passanto sammattaniyāmaṁ okkamati.