3.6. Pāṭihāriyakathā

ps3.6:3.1 <b>Katamañca</b>, <b>bhikkhave, ādesanāpāṭihāriyaṁ?</b>

ps3.6:3.2 Idha, bhikkhave, ekacco nimittena ādisati—

ps3.6:3.3 ‘evampi te mano, itthampi te mano, itipi te cittan’ti.

ps3.6:3.4 So bahuñcepi ādisati, tatheva taṁ hoti, no aññathā.

ps3.6:3.5 Idha pana, bhikkhave, ekacco na heva kho nimittena ādisati, api ca kho manussānaṁ vā amanussānaṁ vā devatānaṁ vā saddaṁ sutvā ādisati—

ps3.6:3.6 ‘evampi te mano, itthampi te mano, itipi te cittan’ti.

ps3.6:3.7 So bahuñcepi ādisati, tatheva taṁ hoti, no aññathā.

ps3.6:3.8 Idha pana, bhikkhave, ekacco na heva kho nimittena ādisati, napi manussānaṁ vā amanussānaṁ vā devatānaṁ vā saddaṁ sutvā ādisati, api ca kho vitakkayato vicārayato vitakkavipphārasaddaṁ sutvā ādisati—

ps3.6:3.9 ‘evampi te mano, itthampi te mano, itipi te cittan’ti.

ps3.6:3.10 So bahuñcepi ādisati, tatheva taṁ hoti, no aññathā.

ps3.6:3.11 Idha pana, bhikkhave, ekacco na heva kho nimittena ādisati, napi manussānaṁ vā amanussānaṁ vā devatānaṁ vā saddaṁ sutvā ādisati, napi vitakkayato vicārayato vitakkavipphārasaddaṁ sutvā ādisati, api ca kho avitakkaṁ avicāraṁ samādhiṁ samāpannassa cetasā ceto paricca pajānāti—

ps3.6:3.12 ‘yathā imassa bhoto manosaṅkhārā paṇihitā imassa cittassa anantarā amukaṁ nāma vitakkaṁ vitakkayissatī’ti.

ps3.6:3.13 So bahuñcepi ādisati, tatheva taṁ hoti, no aññathā.

ps3.6:3.14 Idaṁ vuccati, bhikkhave, ādesanāpāṭihāriyaṁ.