3.5. Cariyākathā

ps3.5:3.1 Iriyāpathacariyā ca paṇidhisampannānaṁ.

ps3.5:3.2 Āyatanacariyā ca indriyesu guttadvārānaṁ.

ps3.5:3.3 Saticariyā ca appamādavihārīnaṁ.

ps3.5:3.4 Samādhicariyā ca adhicittamanuyuttānaṁ.

ps3.5:3.5 Ñāṇacariyā ca buddhisampannānaṁ.

ps3.5:3.6 Maggacariyā ca sammāpaṭipannānaṁ.

ps3.5:3.7 Patticariyā ca adhigataphalānaṁ.

ps3.5:3.8 Lokatthacariyā ca tathāgatānaṁ arahantānaṁ sammāsambuddhānaṁ padese paccekabuddhānaṁ padese sāvakānaṁ.

ps3.5:3.9 Imā aṭṭha cariyāyo.