ps3.3:18.1 Na hi atīte kilese pajahati, na anāgate kilese pajahati, na paccuppanne kilese pajahatīti.
BAGIAN 18
ps3.3:18.2 Hañci na atīte kilese pajahati, na anāgate …pe…
ps3.3:18.3 na paccuppanne kilese pajahati, tena hi natthi maggabhāvanā, natthi phalasacchikiriyā, natthi kilesappahānaṁ, natthi dhammābhisamayoti?
ps3.3:18.4 Atthi maggabhāvanā, atthi phalasacchikiriyā, atthi kilesappahānaṁ, atthi dhammābhisamayo.
ps3.3:18.5 Yathā kathaṁ viya?
ps3.3:18.6 Seyyathāpi taruṇo rukkho ajātaphalo.
ps3.3:18.7 Tamenaṁ puriso mūlaṁ chindeyya.
ps3.3:18.8 Ye tassa rukkhassa ajātaphalā, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti.
ps3.3:18.9 Evamevaṁ uppādo hetu, uppādo paccayo kilesānaṁ nibbattiyāti.
ps3.3:18.10 Uppāde ādīnavaṁ disvā anuppāde cittaṁ pakkhandati.
ps3.3:18.11 Anuppāde cittassa pakkhandattā ye uppādapaccayā kilesā nibbatteyyuṁ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti.
ps3.3:18.12 Evaṁ hetunirodhā dukkhanirodho.
ps3.3:18.13 Pavattaṁ hetu, nimittaṁ hetu, āyūhanā hetu.
ps3.3:18.14 Āyūhanā paccayo kilesānaṁ nibbattiyāti.
ps3.3:18.15 Āyūhane ādīnavaṁ disvā anāyūhane cittaṁ pakkhandati.
ps3.3:18.16 Anāyūhane cittassa pakkhandattā, ye āyūhanapaccayā kilesā nibbatteyyuṁ, te ajātāyeva na jāyanti, anibbattāyeva na nibbattanti, anuppannāyeva na uppajjanti, apātubhūtāyeva na pātubhavanti.
ps3.3:18.17 Evaṁ hetunirodhā dukkhanirodho.
ps3.3:18.18 Evaṁ atthi maggabhāvanā, atthi phalasacchikiriyā, atthi kilesappahānaṁ, atthi dhammābhisamayoti.
ps3.3:18.19 Abhisamayakathā niṭṭhitā.