3.2. Iddhikathā

ps3.2:14.1 <b>Yāva brahmalokāpi kāyena vasaṁ vattetī</b>ti sace so iddhimā cetovasippatto brahmalokaṁ gantukāmo hoti, dūrepi santike adhiṭṭhāti—

ps3.2:14.2 “santike hotū”ti.

ps3.2:14.3 Santike hoti.

ps3.2:14.4 Santikepi dūre adhiṭṭhāti—

ps3.2:14.5 “dūre hotū”ti.

ps3.2:14.6 Dūre hoti.

ps3.2:14.7 Bahukampi thokaṁ adhiṭṭhāti—

ps3.2:14.8 “thokaṁ hotū”ti.

ps3.2:14.9 Thokaṁ hoti.

ps3.2:14.10 Thokampi bahukaṁ adhiṭṭhāti—

ps3.2:14.11 “bahukaṁ hotū”ti.

ps3.2:14.12 Bahukaṁ hoti.

ps3.2:14.13 Dibbena cakkhunā tassa brahmuno rūpaṁ passati.

ps3.2:14.14 Dibbāya sotadhātuyā tassa brahmuno saddaṁ suṇāti.

ps3.2:14.15 Cetopariyañāṇena tassa brahmuno cittaṁ pajānāti.

ps3.2:14.16 Sace so iddhimā cetovasippatto dissamānena kāyena brahmalokaṁ gantukāmo hoti, kāyavasena cittaṁ pariṇāmeti, kāyavasena cittaṁ adhiṭṭhāti.

ps3.2:14.17 Kāyavasena cittaṁ pariṇāmetvā, kāyavasena cittaṁ adhiṭṭhahitvā, sukhasaññañca lahusaññañca okkamitvā dissamānena kāyena brahmalokaṁ gacchati.

ps3.2:14.18 Sace so iddhimā cetovasippatto adissamānena kāyena brahmalokaṁ gantukāmo hoti, cittavasena kāyaṁ pariṇāmeti, cittavasena kāyaṁ adhiṭṭhāti.

ps3.2:14.19 Cittavasena kāyaṁ pariṇāmetvā, cittavasena kāyaṁ adhiṭṭhahitvā sukhasaññañca lahusaññañca okkamitvā adissamānena kāyena brahmalokaṁ gacchati.

ps3.2:14.20 So tassa brahmuno purato rūpiṁ abhinimmināti manomayaṁ sabbaṅgapaccaṅgiṁ ahīnindriyaṁ.

ps3.2:14.21 Sace so iddhimā caṅkamati, nimmitopi tattha caṅkamati.

ps3.2:14.22 Sace so iddhimā tiṭṭhati, nimmitopi tattha tiṭṭhati.

ps3.2:14.23 Sace so iddhimā nisīdati, nimmitopi tattha nisīdati.

ps3.2:14.24 Sace so iddhimā seyyaṁ kappeti, nimmitopi tattha seyyaṁ kappeti.

ps3.2:14.25 Sace so iddhimā dhūmāyati, nimmitopi tattha dhūmāyati.

ps3.2:14.26 Sace so iddhimā pajjalati, nimmitopi tattha pajjalati.

ps3.2:14.27 Sace so iddhimā dhammaṁ bhāsati, nimmitopi tattha dhammaṁ bhāsati.

ps3.2:14.28 Sace so iddhimā pañhaṁ pucchati, nimmitopi tattha pañhaṁ pucchati.

ps3.2:14.29 Sace so iddhimā pañhaṁ puṭṭho visajjeti, nimmitopi tattha pañhaṁ puṭṭho visajjeti.

ps3.2:14.30 Sace so iddhimā tena brahmunā saddhiṁ santiṭṭhati sallapati sākacchaṁ samāpajjati, nimmitopi tattha tena brahmunā saddhiṁ santiṭṭhati sallapati sākacchaṁ samāpajjati.

ps3.2:14.31 Yaññadeva so iddhimā karoti, taṁtadeva hi so nimmito karotīti—

ps3.2:14.32 ayaṁ adhiṭṭhānā iddhi.