2.5. Virāgakathā

ps2.5:10.1 Dassanavirāgo sammādiṭṭhi.

ps2.5:10.2 Abhiniropanavirāgo sammāsaṅkappo.

ps2.5:10.3 Pariggahavirāgo sammāvācā.

ps2.5:10.4 Samuṭṭhānavirāgo sammākammanto.

ps2.5:10.5 Vodānavirāgo sammāājīvo.

ps2.5:10.6 Paggahavirāgo sammāvāyāmo.

ps2.5:10.7 Upaṭṭhānavirāgo sammāsati.

ps2.5:10.8 Avikkhepavirāgo sammāsamādhi.

ps2.5:10.9 Upaṭṭhānavirāgo satisambojjhaṅgo.

ps2.5:10.10 Pavicayavirāgo dhammavicayasambojjhaṅgo.

ps2.5:10.11 Paggahavirāgo vīriyasambojjhaṅgo.

ps2.5:10.12 Pharaṇavirāgo pītisambojjhaṅgo.

ps2.5:10.13 Upasamavirāgo passaddhisambojjhaṅgo.

ps2.5:10.14 Avikkhepavirāgo samādhisambojjhaṅgo.

ps2.5:10.15 Paṭisaṅkhānavirāgo upekkhāsambojjhaṅgo.

ps2.5:10.16 Assaddhiye akampiyavirāgo saddhābalaṁ.

ps2.5:10.17 Kosajje akampiyavirāgo vīriyabalaṁ.

ps2.5:10.18 Pamāde akampiyavirāgo satibalaṁ.

ps2.5:10.19 Uddhacce akampiyavirāgo samādhibalaṁ.

ps2.5:10.20 Avijjāya akampiyavirāgo paññābalaṁ.

ps2.5:10.21 Adhimokkhavirāgo saddhindriyaṁ.

ps2.5:10.22 Paggahavirāgo vīriyindriyaṁ.

ps2.5:10.23 Upaṭṭhānavirāgo satindriyaṁ.

ps2.5:10.24 Avikkhepavirāgo samādhindriyaṁ.

ps2.5:10.25 Dassanavirāgo paññindriyaṁ.

ps2.5:10.26 Ādhipateyyaṭṭhena indriyāni virāgo.

ps2.5:10.27 Akampiyaṭṭhena balaṁ virāgo.

ps2.5:10.28 Niyyānaṭṭhena bojjhaṅgā virāgo.

ps2.5:10.29 Hetuṭṭhena maggo virāgo.

ps2.5:10.30 Upaṭṭhānaṭṭhena satipaṭṭhānā virāgo.

ps2.5:10.31 Padahanaṭṭhena sammappadhānā virāgo.

ps2.5:10.32 Ijjhanaṭṭhena iddhipādā virāgo.

ps2.5:10.33 Tathaṭṭhena saccā virāgo.

ps2.5:10.34 Avikkhepaṭṭhena samatho virāgo.

ps2.5:10.35 Anupassanaṭṭhena vipassanā virāgo.

ps2.5:10.36 Ekarasaṭṭhena samathavipassanā virāgo.

ps2.5:10.37 Anativattanaṭṭhena yuganaddhaṁ virāgo.

ps2.5:10.38 Saṁvaraṭṭhena sīlavisuddhi virāgo.

ps2.5:10.39 Avikkhepaṭṭhena cittavisuddhi virāgo.

ps2.5:10.40 Dassanaṭṭhena diṭṭhivisuddhi virāgo.

ps2.5:10.41 Vimuttaṭṭhena vimokkho virāgo.

ps2.5:10.42 Paṭivedhaṭṭhena vijjā virāgo.

ps2.5:10.43 Pariccāgaṭṭhena vimutti virāgo.

ps2.5:10.44 Samucchedaṭṭhena khaye ñāṇaṁ virāgo.

ps2.5:10.45 Chando mūlaṭṭhena virāgo.

ps2.5:10.46 Manasikāro samuṭṭhānaṭṭhena virāgo.

ps2.5:10.47 Phasso samodhānaṭṭhena virāgo.

ps2.5:10.48 Vedanā samosaraṇaṭṭhena virāgo.

ps2.5:10.49 Samādhi pamukhaṭṭhena virāgo.

ps2.5:10.50 Sati ādhipateyyaṭṭhena virāgo.

ps2.5:10.51 Paññā taduttaraṭṭhena virāgo.

ps2.5:10.52 Vimutti sāraṭṭhena virāgo.

ps2.5:10.53 Amatogadhaṁ nibbānaṁ pariyosānaṭṭhena maggo.