2.4. Mettākathā

ps2.4:6.0 2.4.1. Indriyavāra

ps2.4:6.1 Sabbesaṁ sattānaṁ pīḷanaṁ vajjetvā apīḷanāya, upaghātaṁ vajjetvā anupaghātena, santāpaṁ vajjetvā asantāpena, pariyādānaṁ vajjetvā apariyādānena, vihesaṁ vajjetvā avihesāya, sabbe sattā averino hontu mā verino, sukhino hontu mā dukkhino, sukhitattā hontu mā dukkhitattāti—

ps2.4:6.2 imehi aṭṭhahākārehi sabbe satte mettāyatīti—mettā.

ps2.4:6.3 Taṁ dhammaṁ cetayatīti—ceto.

ps2.4:6.4 Sabbabyāpādapariyuṭṭhānehi vimuccatīti—vimutti.

ps2.4:6.5 Mettā ca ceto ca vimutti cāti—mettācetovimutti.