2.2. Saccakathā

ps2.2:22.1 Siyā tīṇi saccāni ekasaccena saṅgahitāni, ekasaccaṁ tīhi saccehi saṅgahitaṁ?

ps2.2:22.2 Vatthuvasena pariyāyena siyāti.

ps2.2:22.3 Kathañca siyā?

ps2.2:22.4 Yaṁ dukkhasaccaṁ akusalaṁ, samudayasaccaṁ akusalaṁ—

ps2.2:22.5 evaṁ akusalaṭṭhena dve saccāni ekasaccena saṅgahitāni, ekasaccaṁ dvīhi saccehi saṅgahitaṁ.

ps2.2:22.6 Yaṁ dukkhasaccaṁ kusalaṁ, maggasaccaṁ kusalaṁ—

ps2.2:22.7 evaṁ kusalaṭṭhena dve saccāni ekasaccena saṅgahitāni, ekasaccaṁ dvīhi saccehi saṅgahitaṁ.

ps2.2:22.8 Yaṁ dukkhasaccaṁ abyākataṁ, nirodhasaccaṁ abyākataṁ—

ps2.2:22.9 evaṁ abyākataṭṭhena dve saccāni ekasaccena saṅgahitāni, ekasaccaṁ dvīhi saccehi saṅgahitaṁ.

ps2.2:22.10 Evaṁ siyā tīṇi saccāni ekasaccena saṅgahitāni, ekasaccaṁ tīhi saccehi saṅgahitaṁ vatthuvasena pariyāyenāti.