2.2. Saccakathā

ps2.2:11.1 Katihākārehi cattāri saccāni ekappaṭivedhāni?

ps2.2:11.2 Yaṁ aniccaṁ taṁ dukkhaṁ, yaṁ dukkhaṁ taṁ aniccaṁ, yaṁ aniccañca dukkhañca taṁ anattā.

ps2.2:11.3 Yaṁ aniccañca dukkhañca anattā ca taṁ tathaṁ.

ps2.2:11.4 Yaṁ aniccaṁ ca dukkhañca anattā ca tathañca taṁ saccaṁ.

ps2.2:11.5 Yaṁ aniccañca dukkhañca anattā ca tathañca saccañca taṁ ekasaṅgahitaṁ.

ps2.2:11.6 Yaṁ ekasaṅgahitaṁ taṁ ekattaṁ.

ps2.2:11.7 Ekattaṁ ekena ñāṇena paṭivijjhatīti—

ps2.2:11.8 cattāri saccāni ekappaṭivedhāni.