2.2. Saccakathā

ps2.2:1.1 Purimanidānaṁ.

ps2.2:1.2 “Cattārimāni, bhikkhave, tathāni avitathāni anaññathāni.

ps2.2:1.3 Katamāni cattāri?

ps2.2:1.4 ‘Idaṁ dukkhan’ti, bhikkhave, tathametaṁ avitathametaṁ anaññathametaṁ;

ps2.2:1.5 ‘ayaṁ dukkhasamudayo’ti tathametaṁ avitathametaṁ anaññathametaṁ, ‘ayaṁ dukkhanirodho’ti tathametaṁ avitathametaṁ anaññathametaṁ, ‘ayaṁ dukkhanirodhagāminī paṭipadā’ti tathametaṁ avitathametaṁ anaññathametaṁ.

ps2.2:1.6 Imāni kho, bhikkhave, cattāri tathāni avitathāni anaññathāni”.