2.1. Yuganaddhakathā

ps2.1:8.0 2.1.1. Suttantaniddesa

ps2.1:8.1 Kathaṁ <b>samathapubbaṅgamaṁ vipassanaṁ bhāveti?</b>

ps2.1:8.2 Nekkhammavasena cittassa ekaggatā avikkhepo samādhi.

ps2.1:8.3 Tattha jāte dhamme aniccato anupassanaṭṭhena vipassanā, dukkhato anupassanaṭṭhena vipassanā, anattato anupassanaṭṭhena vipassanā.

ps2.1:8.4 Iti paṭhamaṁ samatho, pacchā vipassanā.

ps2.1:8.5 Tena vuccati—

ps2.1:8.6 “samathapubbaṅgamaṁ vipassanaṁ bhāvetī”ti.

ps2.1:8.7 <b>Bhāvetī</b>ti catasso bhāvanā—

ps2.1:8.8 tattha jātānaṁ dhammānaṁ anativattanaṭṭhena bhāvanā, indriyānaṁ ekarasaṭṭhena bhāvanā, tadupagavīriyavāhanaṭṭhena bhāvanā, āsevanaṭṭhena bhāvanā.