1.6. Gatikathā

ps1.6:3.1 Gatisampattiyā ñāṇasampayutte katamesaṁ aṭṭhannaṁ hetūnaṁ paccayā upapatti hoti?

ps1.6:3.2 Kusalakammassa javanakkhaṇe tayo hetū kusalā;

ps1.6:3.3 tasmiṁ khaṇe jātacetanāya sahajātapaccayā honti.

ps1.6:3.4 Tena vuccati—

ps1.6:3.5 kusalamūlapaccayāpi saṅkhārā.

ps1.6:3.6 Nikantikkhaṇe dve hetū akusalā;

ps1.6:3.7 tasmiṁ khaṇe jātacetanāya sahajātapaccayā honti.

ps1.6:3.8 Tena vuccati—

ps1.6:3.9 akusalamūlapaccayāpi saṅkhārā.

ps1.6:3.10 Paṭisandhikkhaṇe tayo hetū abyākatā;

ps1.6:3.11 tasmiṁ khaṇe jātacetanāya sahajātapaccayā honti.

ps1.6:3.12 Tena vuccati—

ps1.6:3.13 “nāmarūpapaccayāpi viññāṇaṁ, viññāṇapaccayāpi nāmarūpaṁ”.