1.5. Vimokkhakathā

ps1.5:70.1 Saddahanto vimuttoti—

ps1.5:70.2 saddhāvimutto.

ps1.5:70.3 Phuṭṭhattā sacchikatoti—

ps1.5:70.4 kāyasakkhī.

ps1.5:70.5 Diṭṭhattā pattoti—

ps1.5:70.6 diṭṭhippatto.

ps1.5:70.7 Saddahanto vimuccatīti—

ps1.5:70.8 saddhāvimutto.

ps1.5:70.9 Jhānaphassaṁ paṭhamaṁ phusati, pacchā nirodhaṁ nibbānaṁ sacchikarotīti—

ps1.5:70.10 kāyasakkhī.

ps1.5:70.11 “Dukkhā saṅkhārā, sukho nirodho”ti ñātaṁ hoti diṭṭhaṁ viditaṁ sacchikataṁ phassitaṁ paññāyāti—

ps1.5:70.12 diṭṭhippatto.

ps1.5:70.13 Yo cāyaṁ puggalo saddhāvimutto, yo ca kāyasakkhī, yo ca diṭṭhippatto, siyā ime tayo puggalā saddhāvimuttāpi kāyasakkhīpi diṭṭhippattāpi vatthuvasena pariyāyena <b>siyā</b>ti.

ps1.5:70.14 Kathañca siyā?

ps1.5:70.15 Aniccato manasikaroto saddhindriyaṁ adhimattaṁ hoti.

ps1.5:70.16 Saddhindriyassa adhimattattā saddhāvimutto hoti.

ps1.5:70.17 Dukkhato manasikaroto saddhindriyaṁ adhimattaṁ hoti.

ps1.5:70.18 Saddhindriyassa adhimattattā saddhāvimutto hoti.

ps1.5:70.19 Anattato manasikaroto saddhindriyaṁ adhimattaṁ hoti.

ps1.5:70.20 Saddhindriyassa adhimattattā saddhāvimutto hoti.

ps1.5:70.21 Evaṁ ime tayo puggalā saddhindriyassa vasena saddhāvimuttā.