1.5. Vimokkhakathā

ps1.5:47.1 Katamo <b>ñāṇavimokkho?</b>

ps1.5:47.2 Siyā eko ñāṇavimokkho dasa ñāṇavimokkhā honti, dasa ñāṇavimokkhā eko ñāṇavimokkho hoti vatthuvasena pariyāyena <b>siyā</b>ti.

ps1.5:47.3 Kathañca siyā?

ps1.5:47.4 Aniccānupassanā yathābhūtaṁ ñāṇaṁ niccato sammohā aññāṇā muccatīti—

ps1.5:47.5 ñāṇavimokkho.

ps1.5:47.6 Dukkhānupassanā yathābhūtaṁ ñāṇaṁ sukhato sammohā aññāṇā muccatīti—

ps1.5:47.7 ñāṇavimokkho.

ps1.5:47.8 Anattānupassanā yathābhūtaṁ ñāṇaṁ attato sammohā aññāṇā muccatīti—

ps1.5:47.9 ñāṇavimokkho.

ps1.5:47.10 Nibbidānupassanā yathābhūtaṁ ñāṇaṁ nandiyā sammohā aññāṇā muccatīti—

ps1.5:47.11 ñāṇavimokkho.

ps1.5:47.12 Virāgānupassanā yathābhūtaṁ ñāṇaṁ rāgato sammohā aññāṇā muccatīti—

ps1.5:47.13 ñāṇavimokkho.

ps1.5:47.14 Nirodhānupassanā yathābhūtaṁ ñāṇaṁ samudayato sammohā aññāṇā muccatīti—

ps1.5:47.15 ñāṇavimokkho.

ps1.5:47.16 Paṭinissaggānupassanā yathābhūtaṁ ñāṇaṁ ādānato sammohā aññāṇā muccatīti—

ps1.5:47.17 ñāṇavimokkho.

ps1.5:47.18 Animittānupassanā yathābhūtaṁ ñāṇaṁ nimittato sammohā aññāṇā muccatīti—

ps1.5:47.19 ñāṇavimokkho.

ps1.5:47.20 Appaṇihitānupassanā yathābhūtaṁ ñāṇaṁ paṇidhiyā sammohā aññāṇā muccatīti—

ps1.5:47.21 ñāṇavimokkho.

ps1.5:47.22 Suññatānupassanā yathābhūtaṁ ñāṇaṁ abhinivesato sammohā aññāṇā muccatīti—

ps1.5:47.23 ñāṇavimokkho.

ps1.5:47.24 Evaṁ siyā eko ñāṇavimokkho dasa ñāṇavimokkhā honti, dasa ñāṇavimokkhā eko ñāṇavimokkho hoti vatthuvasena pariyāyena.