1.5. Vimokkhakathā

ps1.5:2.1 Api ca aṭṭhasaṭṭhi vimokkhā—

ps1.5:2.2 suññato vimokkho, animitto vimokkho, appaṇihito vimokkho;

ps1.5:2.3 ajjhattavuṭṭhāno vimokkho, bahiddhāvuṭṭhāno vimokkho, dubhato vuṭṭhāno vimokkho;

ps1.5:2.4 ajjhattavuṭṭhānā cattāro vimokkhā, bahiddhāvuṭṭhānā cattāro vimokkhā, dubhato vuṭṭhānā cattāro vimokkhā;

ps1.5:2.5 ajjhattavuṭṭhānānaṁ anulomā cattāro vimokkhā, bahiddhāvuṭṭhānānaṁ anulomā cattāro vimokkhā, dubhato vuṭṭhānānaṁ anulomā cattāro vimokkhā;

ps1.5:2.6 ajjhattavuṭṭhānapaṭippassaddhī cattāro vimokkhā, bahiddhāvuṭṭhānapaṭippassaddhī cattāro vimokkhā, dubhato vuṭṭhānapaṭippassaddhī cattāro vimokkhā;

ps1.5:2.7 rūpī rūpāni passatīti vimokkho, ajjhattaṁ arūpasaññī bahiddhā rūpāni passatīti vimokkho, subhaṁ teva adhimutto hotīti vimokkho;

ps1.5:2.8 ākāsānañcāyatanasamāpatti vimokkho, viññāṇañcāyatanasamāpatti vimokkho, ākiñcaññāyatanasamāpatti vimokkho;

ps1.5:2.9 nevasaññānāsaññāyatanasamāpatti vimokkho, saññāvedayitanirodhasamāpatti vimokkho;

ps1.5:2.10 samayavimokkho, asamayavimokkho;

ps1.5:2.11 sāmayiko vimokkho, asāmayiko vimokkho;

ps1.5:2.12 kuppo vimokkho, akuppo vimokkho;

ps1.5:2.13 lokiko vimokkho, lokuttaro vimokkho;

ps1.5:2.14 sāsavo vimokkho, anāsavo vimokkho;

ps1.5:2.15 sāmiso vimokkho, nirāmiso vimokkho;

ps1.5:2.16 nirāmisānirāmisataro vimokkho, paṇihito vimokkho, appaṇihito vimokkho, paṇihitappaṭippassaddhi vimokkho;

ps1.5:2.17 saññutto vimokkho, visaññutto vimokkho;

ps1.5:2.18 ekattavimokkho, nānattavimokkho, saññāvimokkho, ñāṇavimokkho;

ps1.5:2.19 sītisiyāvimokkho, jhānavimokkho, anupādācittassa vimokkho”. [75]