1.5. Vimokkhakathā

ps1.5:16.1 Kathaṁ <b>rūpī rūpāni passatīti—vimokkho?</b>

ps1.5:16.2 Idhekacco ajjhattaṁ paccattaṁ nīlanimittaṁ manasikaroti, nīlasaññaṁ paṭilabhati.

ps1.5:16.3 So taṁ nimittaṁ suggahitaṁ karoti, sūpadhāritaṁ upadhāreti, svāvatthitaṁ avatthāpeti.

ps1.5:16.4 So taṁ nimittaṁ suggahitaṁ katvā sūpadhāritaṁ upadhāretvā svāvatthitaṁ avatthāpetvā bahiddhā nīlanimitte cittaṁ upasaṁharati, nīlasaññaṁ paṭilabhati.

ps1.5:16.5 So taṁ nimittaṁ suggahitaṁ karoti, sūpadhāritaṁ upadhāreti, svāvatthitaṁ avatthāpeti.

ps1.5:16.6 So taṁ nimittaṁ suggahitaṁ katvā upadhāretvā svāvatthitaṁ avatthāpetvā āsevati bhāveti bahulīkaroti.

ps1.5:16.7 Tassa evaṁ hoti—

ps1.5:16.8 “ajjhattañca bahiddhā ca ubhayamidaṁ rūpan”ti, rūpasaññī hoti.

ps1.5:16.9 Idhekacco ajjhattaṁ paccattaṁ pītanimittaṁ …pe…

ps1.5:16.10 lohitanimittaṁ …pe…

ps1.5:16.11 odātanimittaṁ manasikaroti, odātasaññaṁ paṭilabhati.

ps1.5:16.12 So taṁ nimittaṁ suggahitaṁ karoti, sūpadhāritaṁ upadhāreti, svāvatthitaṁ avatthāpeti.

ps1.5:16.13 So taṁ nimittaṁ suggahitaṁ katvā sūpadhāritaṁ upadhāretvā svāvatthitaṁ avatthāpetvā bahiddhā odātanimitte cittaṁ upasaṁharati, odātasaññaṁ paṭilabhati.

ps1.5:16.14 So taṁ nimittaṁ suggahitaṁ karoti, sūpadhāritaṁ upadhāreti, svāvatthitaṁ avatthāpeti.

ps1.5:16.15 So taṁ nimittaṁ suggahitaṁ katvā sūpadhāritaṁ upadhāretvā svāvatthitaṁ avatthāpetvā āsevati bhāveti bahulīkaroti.

ps1.5:16.16 Tassa evaṁ hoti—

ps1.5:16.17 “ajjhattañca bahiddhā ca ubhayamidaṁ rūpan”ti, rūpasaññī hoti.

ps1.5:16.18 Evaṁ rūpī rūpāni passatīti—

ps1.5:16.19 vimokkho.