1.4. Indriyakathā

ps1.4:84.1 Puthujjano vipassanaṁ bhāvento katamehi navahi ākārehi upaṭṭhānakusalo hoti, katamehi navahi ākārehi anupaṭṭhānakusalo hoti?

ps1.4:84.2 Aniccato upaṭṭhānakusalo hoti, niccato anupaṭṭhānakusalo hoti.

ps1.4:84.3 Dukkhato upaṭṭhānakusalo hoti, sukhato anupaṭṭhānakusalo hoti.

ps1.4:84.4 Anattato upaṭṭhānakusalo hoti, attato anupaṭṭhānakusalo hoti.

ps1.4:84.5 Khayato upaṭṭhānakusalo hoti, ghanato anupaṭṭhānakusalo hoti.

ps1.4:84.6 Vayato upaṭṭhānakusalo hoti, āyūhanānupaṭṭhānakusalo hoti.

ps1.4:84.7 Vipariṇāmūpaṭṭhānakusalo hoti, dhuvato anupaṭṭhānakusalo hoti.

ps1.4:84.8 Animittūpaṭṭhānakusalo hoti, nimittānupaṭṭhānakusalo hoti.

ps1.4:84.9 Appaṇihitūpaṭṭhānakusalo hoti, paṇidhianupaṭṭhānakusalo hoti.

ps1.4:84.10 Suññatūpaṭṭhānakusalo hoti, abhinivesānupaṭṭhānakusalo hoti—

ps1.4:84.11 puthujjano vipassanaṁ bhāvento imehi navahi ākārehi upaṭṭhānakusalo hoti, imehi navahi ākārehi anupaṭṭhānakusalo hoti.