1.4. Indriyakathā

ps1.4:71.0 1.4.4.3. Adhimattaṭṭhaniddesa

ps1.4:71.1 Kathaṁ <b>adhimattaṭṭhena indriyāni daṭṭhabbāni?</b>

ps1.4:71.2 Saddhindriyassa bhāvanāya chando uppajjati—

ps1.4:71.3 chandavasena saddhāvasena saddhindriyaṁ adhimattaṁ hoti.

ps1.4:71.4 Chandavasena pāmojjaṁ uppajjati—

ps1.4:71.5 pāmojjavasena saddhāvasena saddhindriyaṁ adhimattaṁ hoti.

ps1.4:71.6 Pāmojjavasena pīti uppajjati—

ps1.4:71.7 pītivasena saddhāvasena saddhindriyaṁ adhimattaṁ hoti.

ps1.4:71.8 Pītivasena passaddhi uppajjati—

ps1.4:71.9 passaddhivasena saddhāvasena saddhindriyaṁ adhimattaṁ hoti.

ps1.4:71.10 Passaddhivasena sukhaṁ uppajjati—

ps1.4:71.11 sukhavasena saddhāvasena saddhindriyaṁ adhimattaṁ hoti.

ps1.4:71.12 Sukhavasena obhāso uppajjati—

ps1.4:71.13 obhāsavasena saddhāvasena saddhindriyaṁ adhimattaṁ hoti.

ps1.4:71.14 Obhāsavasena saṁvego uppajjati—

ps1.4:71.15 saṁvegavasena saddhāvasena saddhindriyaṁ adhimattaṁ hoti.

ps1.4:71.16 Saṁvejetvā cittaṁ samādahati—

ps1.4:71.17 samādhivasena saddhāvasena saddhindriyaṁ adhimattaṁ hoti.

ps1.4:71.18 Tathā samāhitaṁ cittaṁ sādhukaṁ paggaṇhāti—

ps1.4:71.19 paggahavasena saddhāvasena saddhindriyaṁ adhimattaṁ hoti.

ps1.4:71.20 Tathāpaggahitaṁ cittaṁ sādhukaṁ ajjhupekkhati—

ps1.4:71.21 upekkhāvasena saddhāvasena saddhindriyaṁ adhimattaṁ hoti.

ps1.4:71.22 Upekkhāvasena nānattakilesehi cittaṁ vimuccati—

ps1.4:71.23 vimokkhavasena saddhāvasena saddhindriyaṁ adhimattaṁ hoti.

ps1.4:71.24 Vimuttattā te dhammā ekarasā honti—

ps1.4:71.25 ekarasaṭṭhena bhāvanāvasena saddhāvasena saddhindriyaṁ adhimattaṁ hoti.

ps1.4:71.26 Bhāvitattā tato paṇītatare vivaṭṭanti—

ps1.4:71.27 vivaṭṭanāvasena saddhāvasena saddhindriyaṁ adhimattaṁ hoti.

ps1.4:71.28 Vivaṭṭitattā tato vosajjati—

ps1.4:71.29 vosaggavasena saddhāvasena saddhindriyaṁ adhimattaṁ hoti.

ps1.4:71.30 Vosajjitattā tato nirujjhanti—

ps1.4:71.31 nirodhavasena saddhāvasena saddhindriyaṁ adhimattaṁ hoti.