1.4. Indriyakathā

ps1.4:7.1 Katinaṁ puggalānaṁ indriyabhāvanā;

ps1.4:7.2 kati puggalā bhāvitindriyā?

ps1.4:7.3 Aṭṭhannaṁ puggalānaṁ indriyabhāvanā;

ps1.4:7.4 tayo puggalā bhāvitindriyā.

ps1.4:7.5 Katamesaṁ aṭṭhannaṁ puggalānaṁ indriyabhāvanā?

ps1.4:7.6 Sattannañca sekkhānaṁ, puthujjanakalyāṇakassa ca—

ps1.4:7.7 imesaṁ aṭṭhannaṁ puggalānaṁ indriyabhāvanā.

ps1.4:7.8 Katame tayo puggalā bhāvitindriyā?

ps1.4:7.9 Savanena buddho tathāgatassa sāvako khīṇāsavo bhāvitindriyo, sayaṁ bhūtaṭṭhena paccekasambuddho bhāvitindriyo, appameyyaṭṭhena tathāgato arahaṁ sammāsambuddho bhāvitindriyo—

ps1.4:7.10 ime tayo puggalā bhāvitindriyā.

ps1.4:7.11 Iti imesaṁ aṭṭhannaṁ puggalānaṁ indriyabhāvanā;

ps1.4:7.12 ime tayo puggalā bhāvitindriyā.

ps1.4:7.13 Suttantaniddeso paṭhamo.