1.4. Indriyakathā

ps1.4:5.1 Katihākārehi pañcindriyāni bhāvitāni honti subhāvitāni?

ps1.4:5.2 Dasahākārehi pañcindriyāni bhāvitāni honti subhāvitāni.

ps1.4:5.3 Assaddhiyassa pahīnattā suppahīnattā saddhindriyaṁ bhāvitaṁ hoti subhāvitaṁ;

ps1.4:5.4 saddhindriyassa bhāvitattā subhāvitattā assaddhiyaṁ pahīnaṁ hoti suppahīnaṁ.

ps1.4:5.5 Kosajjassa pahīnattā suppahīnattā vīriyindriyaṁ bhāvitaṁ hoti subhāvitaṁ;

ps1.4:5.6 vīriyindriyassa bhāvitattā subhāvitattā kosajjaṁ pahīnaṁ hoti suppahīnaṁ.

ps1.4:5.7 Pamādassa pahīnattā suppahīnattā satindriyaṁ bhāvitaṁ hoti subhāvitaṁ;

ps1.4:5.8 satindriyassa bhāvitattā subhāvitattā pamādo pahīno hoti suppahīno.

ps1.4:5.9 Uddhaccassa pahīnattā suppahīnattā samādhindriyaṁ bhāvitaṁ hoti subhāvitaṁ;

ps1.4:5.10 samādhindriyassa bhāvitattā subhāvitattā uddhaccaṁ pahīnaṁ hoti suppahīnaṁ.

ps1.4:5.11 Avijjāya pahīnattā paññindriyaṁ bhāvitaṁ hoti subhāvitaṁ;

ps1.4:5.12 paññindriyassa bhāvitattā subhāvitattā avijjā pahīnā hoti suppahīnā.

ps1.4:5.13 Imehi dasahākārehi pañcindriyāni bhāvitāni honti subhāvitāni.