1.4. Indriyakathā

ps1.4:3.1 Imāni pañcindriyāni katihākārehi visujjhanti?

ps1.4:3.2 Imāni pañcindriyāni pannarasahi ākārehi visujjhanti.

ps1.4:3.3 Assaddhe puggale parivajjayato, saddhe puggale sevato bhajato payirupāsato, pasādanīye suttante paccavekkhato—

ps1.4:3.4 imehi tīhākārehi saddhindriyaṁ visujjhati.

ps1.4:3.5 Kusīte puggale parivajjayato, āraddhavīriye puggale sevato bhajato payirupāsato, sammappadhāne paccavekkhato—

ps1.4:3.6 imehi tīhākārehi vīriyindriyaṁ visujjhati.

ps1.4:3.7 Muṭṭhassatī puggale parivajjayato, upaṭṭhitassatī puggale sevato bhajato payirupāsato, satipaṭṭhāne paccavekkhato—

ps1.4:3.8 imehi tīhākārehi satindriyaṁ visujjhati.

ps1.4:3.9 Asamāhite puggale parivajjayato, samāhite puggale sevato bhajato payirupāsato, jhānavimokkhe paccavekkhato—

ps1.4:3.10 imehi tīhākārehi samādhindriyaṁ visujjhati.

ps1.4:3.11 Duppaññe puggale parivajjayato, paññavante puggale sevato bhajato payirupāsato, gambhīrañāṇacariyaṁ paccavekkhato—

ps1.4:3.12 imehi tīhākārehi paññindriyaṁ visujjhati.

ps1.4:3.13 Iti ime pañca puggale parivajjayato, pañca puggale sevato bhajato payirupāsato, pañca suttantakkhandhe paccavekkhato—

ps1.4:3.14 imehi pannarasahi ākārehi imāni pañcindriyāni visujjhanti.