ps1.3:95.1 Iti kira “passambhayaṁ kāyasaṅkhāraṁ assasissāmī”ti sikkhati, “passambhayaṁ kāyasaṅkhāraṁ passasissāmī”ti sikkhati.
BAGIAN 95
ps1.3:95.2 Evaṁ sante vātūpaladdhiyā ca pabhāvanā hoti, assāsapassāsānañca pabhāvanā hoti, ānāpānassatiyā ca pabhāvanā hoti.
ps1.3:95.3 Ānāpānassatisamādhissa ca pabhāvanā hoti;
ps1.3:95.4 tañca naṁ samāpattiṁ paṇḍitā samāpajjantipi vuṭṭhahantipi.
ps1.3:95.5 Yathā kathaṁ viya?
ps1.3:95.6 Seyyathāpi kaṁse ākoṭite paṭhamaṁ oḷārikā saddā pavattanti.
ps1.3:95.7 Oḷārikānaṁ saddānaṁ nimittaṁ suggahitattā sumanasikatattā sūpadhāritattā niruddhepi oḷārike sadde, atha pacchā sukhumakā saddā pavattanti.
ps1.3:95.8 Sukhumakānaṁ saddānaṁ nimittaṁ suggahitattā sumanasikatattā sūpadhāritattā niruddhepi sukhumake sadde, atha pacchā sukhumasaddanimittārammaṇatāpi cittaṁ pavattati.
ps1.3:95.9 Evamevaṁ paṭhamaṁ oḷārikā assāsapassāsā pavattanti;
ps1.3:95.10 oḷārikānaṁ assāsapassāsānaṁ nimittaṁ suggahitattā sumanasikatattā sūpadhāritattā niruddhepi oḷārike assāsapassāse, atha pacchā sukhumakā assāsapassāsā pavattanti.
ps1.3:95.11 Sukhumakānaṁ assāsapassāsānaṁ nimittaṁ suggahitattā sumanasikatattā sūpadhāritattā niruddhepi sukhumake assāsapassāse, atha pacchā sukhumakaassāsapassāsānaṁ nimittārammaṇatāpi cittaṁ na vikkhepaṁ gacchati.