ps1.3:63.0 1.3.5.1. Paṭhamacatukkaniddesa
BAGIAN 63
ps1.3:63.1 Kathaṁ dīghaṁ assasanto “dīghaṁ assasāmī”ti pajānāti, dīghaṁ passasanto “dīghaṁ passasāmī”ti pajānāti?
ps1.3:63.2 Dīghaṁ assāsaṁ addhānasaṅkhāte assasati, dīghaṁ passāsaṁ addhānasaṅkhāte passasati, dīghaṁ assāsapassāsaṁ addhānasaṅkhāte assasatipi passasatipi.
ps1.3:63.3 Dīghaṁ assāsapassāsaṁ addhānasaṅkhāte assasatopi passasatopi chando uppajjati.
ps1.3:63.4 Chandavasena tato sukhumataraṁ dīghaṁ assāsaṁ addhānasaṅkhāte assasati, chandavasena tato sukhumataraṁ dīghaṁ passāsaṁ addhānasaṅkhāte passasati, chandavasena tato sukhumataraṁ dīghaṁ assāsapassāsaṁ addhānasaṅkhāte assasatipi passasatipi.
ps1.3:63.5 Chandavasena tato sukhumataraṁ dīghaṁ assāsapassāsaṁ addhānasaṅkhāte assasatopi passasatopi pāmojjaṁ uppajjati.
ps1.3:63.6 Pāmojjavasena tato sukhumataraṁ dīghaṁ assāsaṁ addhānasaṅkhāte assasati, pāmojjavasena tato sukhumataraṁ dīghaṁ passāsaṁ addhānasaṅkhāte passasati, pāmojjavasena tato sukhumataraṁ dīghaṁ assāsapassāsaṁ addhānasaṅkhāte assasatipi passasatipi.
ps1.3:63.7 Pāmojjavasena tato sukhumataraṁ dīghaṁ assāsapassāsaṁ addhānasaṅkhāte assasatopi passasatopi dīghaṁ assāsapassāsāpi cittaṁ vivattati, upekkhā saṇṭhāti.
ps1.3:63.8 Imehi navahākārehi dīghaṁ assāsapassāsā kāyo.
ps1.3:63.9 Upaṭṭhānaṁ sati.
ps1.3:63.10 Anupassanā ñāṇaṁ.
ps1.3:63.11 Kāyo upaṭṭhānaṁ, no sati;
ps1.3:63.12 sati upaṭṭhānañceva sati ca.
ps1.3:63.13 Tāya satiyā tena ñāṇena taṁ kāyaṁ anupassati.
ps1.3:63.14 Tena vuccati—
ps1.3:63.15 “kāye kāyānupassanāsatipaṭṭhānabhāvanā”ti.