1.2. Diṭṭhikathā

ps1.2:81.1 <b>“Taṁ jīvaṁ taṁ sarīran”</b>ti—

ps1.2:81.2 antaggāhikāya diṭṭhiyā katamehi pañcahākārehi abhiniveso hoti?

ps1.2:81.3 Rūpaṁ jīvañceva sarīrañca;

ps1.2:81.4 yaṁ jīvaṁ taṁ sarīraṁ, yaṁ sarīraṁ taṁ jīvanti—

ps1.2:81.5 abhinivesaparāmāso diṭṭhi.

ps1.2:81.6 Tāya diṭṭhiyā so anto gahitoti—

ps1.2:81.7 antaggāhikā diṭṭhi.

ps1.2:81.8 Diṭṭhi na vatthu, vatthu na diṭṭhi.

ps1.2:81.9 Aññā diṭṭhi, aññaṁ vatthu.

ps1.2:81.10 Yā ca diṭṭhi yañca vatthu—

ps1.2:81.11 ayaṁ paṭhamā “taṁ jīvaṁ taṁ sarīran”ti—

ps1.2:81.12 antaggāhikā diṭṭhi.

ps1.2:81.13 Antaggāhikā diṭṭhi micchādiṭṭhi …pe…

ps1.2:81.14 imāni saññojanāni, na ca diṭṭhiyo.