1.2. Diṭṭhikathā

ps1.2:48.1 Kathaṁ <b>vedanaṁ attato samanupassati?</b>

ps1.2:48.2 Idhekacco cakkhusamphassajaṁ vedanaṁ sotasamphassajaṁ vedanaṁ ghānasamphassajaṁ vedanaṁ jivhāsamphassajaṁ vedanaṁ kāyasamphassajaṁ vedanaṁ manosamphassajaṁ vedanaṁ attato samanupassati.

ps1.2:48.3 “Yā manosamphassajā vedanā so ahaṁ, yo ahaṁ sā manosamphassajā vedanā”ti—

ps1.2:48.4 manosamphassajaṁ vedanañca attañca advayaṁ samanupassati.

ps1.2:48.5 Seyyathāpi telappadīpassa jhāyato “yā acci so vaṇṇo, yo vaṇṇo sā accī”ti—

ps1.2:48.6 acciñca vaṇṇañca advayaṁ samanupassati.

ps1.2:48.7 Evamevaṁ idhekacco manosamphassajaṁ vedanaṁ attato samanupassati.

ps1.2:48.8 “Yā manosamphassajā vedanā so ahaṁ, yo ahaṁ sā manosamphassajā vedanā”ti—

ps1.2:48.9 manosamphassajaṁ vedanañca attañca advayaṁ samanupassati.

ps1.2:48.10 Abhinivesaparāmāso diṭṭhi.

ps1.2:48.11 Diṭṭhi na vatthu, vatthu na diṭṭhi.

ps1.2:48.12 Aññā diṭṭhi, aññaṁ vatthu.

ps1.2:48.13 Yā ca diṭṭhi yañca vatthu—

ps1.2:48.14 ayaṁ paṭhamā vedanāvatthukā attānudiṭṭhi.

ps1.2:48.15 Attānudiṭṭhi micchādiṭṭhi diṭṭhivipatti …pe…

ps1.2:48.16 imāni saññojanāni, na ca diṭṭhiyo.

ps1.2:48.17 Evaṁ vedanaṁ attato samanupassati.