ps1.1:507.0 1.1.52. Cetopariyañāṇaniddesa
BAGIAN 507
ps1.1:507.1 Kathaṁ tiṇṇaṁ cittānaṁ vipphārattā indriyānaṁ pasādavasena nānattekattaviññāṇacariyāpariyogāhaṇe paññā cetopariyañāṇaṁ?
ps1.1:507.2 Idha bhikkhu chandasamādhipadhānasaṅkhārasamannāgataṁ iddhipādaṁ bhāveti, vīriyasamādhi …pe…
ps1.1:507.3 cittasamādhi …pe…
ps1.1:507.4 vīmaṁsāsamādhipadhānasaṅkhārasamannāgataṁ iddhipādaṁ bhāveti.
ps1.1:507.5 So imesu catūsu iddhipādesu cittaṁ paribhāveti paridameti, muduṁ karoti kammaniyaṁ.
ps1.1:507.6 So imesu catūsu iddhipādesu cittaṁ paribhāvetvā paridametvā, muduṁ karitvā kammaniyaṁ evaṁ pajānāti—
ps1.1:507.7 “idaṁ rūpaṁ somanassindriyasamuṭṭhitaṁ, idaṁ rūpaṁ domanassindriyasamuṭṭhitaṁ, idaṁ rūpaṁ upekkhindriyasamuṭṭhitan”ti.
ps1.1:507.8 So tathābhāvitena cittena parisuddhena pariyodātena cetopariyañāṇāya cittaṁ abhinīharati abhininnāmeti.
ps1.1:507.9 So parasattānaṁ parapuggalānaṁ cetasā ceto paricca pajānāti—
ps1.1:507.10 sarāgaṁ vā cittaṁ “sarāgaṁ cittan”ti pajānāti,
ps1.1:507.11 vītarāgaṁ vā cittaṁ “vītarāgaṁ cittan”ti pajānāti,
ps1.1:507.12 sadosaṁ vā cittaṁ …pe…
ps1.1:507.13 vītadosaṁ vā cittaṁ …
ps1.1:507.14 samohaṁ vā cittaṁ …
ps1.1:507.15 vītamohaṁ vā cittaṁ …
ps1.1:507.16 saṅkhittaṁ vā cittaṁ …
ps1.1:507.17 vikkhittaṁ vā cittaṁ …
ps1.1:507.18 mahaggataṁ vā cittaṁ …
ps1.1:507.19 amahaggataṁ vā cittaṁ …
ps1.1:507.20 sauttaraṁ vā cittaṁ …
ps1.1:507.21 anuttaraṁ vā cittaṁ …
ps1.1:507.22 samāhitaṁ vā cittaṁ …
ps1.1:507.23 asamāhitaṁ vā cittaṁ …
ps1.1:507.24 vimuttaṁ vā cittaṁ …
ps1.1:507.25 avimuttaṁ vā cittaṁ “avimuttaṁ cittan”ti pajānāti.
ps1.1:507.26 Taṁ ñātaṭṭhena ñāṇaṁ, pajānanaṭṭhena paññā.
ps1.1:507.27 Tena vuccati—
ps1.1:507.28 “tiṇṇaṁ cittānaṁ vipphārattā indriyānaṁ pasādavasena nānattekattaviññāṇacariyāpariyogāhaṇe paññā cetopariyañāṇaṁ”.
ps1.1:507.29 Cetopariyañāṇaniddeso dvepaññāsamo.