1.1. Ñāṇakathā

ps1.1:387.1 Kathaṁ manaṁ ajjhattaṁ vavattheti?

ps1.1:387.2 Mano avijjāsambhūtoti vavattheti, mano taṇhāsambhūtoti vavattheti, mano kammasambhūtoti vavattheti, mano āhārasambhūtoti vavattheti, mano uppannoti vavattheti, mano samudāgatoti vavattheti.

ps1.1:387.3 Mano ahutvā sambhūto, hutvā na bhavissatīti vavattheti.

ps1.1:387.4 Manaṁ antavantato vavattheti, mano addhuvo asassato vipariṇāmadhammoti vavattheti, mano anicco saṅkhato paṭiccasamuppanno khayadhammo vayadhammo virāgadhammo nirodhadhammoti vavattheti.

ps1.1:387.5 Manaṁ aniccato vavattheti, no niccato;

ps1.1:387.6 dukkhato vavattheti, no sukhato;

ps1.1:387.7 anattato vavattheti, no attato;

ps1.1:387.8 nibbindati, no nandati;

ps1.1:387.9 virajjati, no rajjati;

ps1.1:387.10 nirodheti, no samudeti;

ps1.1:387.11 paṭinissajjati, no ādiyati.

ps1.1:387.12 Aniccato vavatthento niccasaññaṁ pajahati, dukkhato vavatthento sukhasaññaṁ pajahati, anattato vavatthento attasaññaṁ pajahati, nibbindanto nandiṁ pajahati, virajjanto rāgaṁ pajahati, nirodhento samudayaṁ pajahati, paṭinissajjanto ādānaṁ pajahati.

ps1.1:387.13 Evaṁ manaṁ ajjhattaṁ vavattheti.

ps1.1:387.14 Evaṁ ajjhattadhamme vavattheti.

ps1.1:387.15 Taṁ ñātaṭṭhena ñāṇaṁ, pajānanaṭṭhena paññā.

ps1.1:387.16 Tena vuccati—

ps1.1:387.17 “ajjhattavavatthāne paññā vatthunānatte ñāṇaṁ”.

ps1.1:387.18 Vatthunānattañāṇaniddeso pannarasamo.