1.1. Ñāṇakathā

ps1.1:382.1 Kathaṁ cakkhuṁ ajjhattaṁ vavattheti?

ps1.1:382.2 Cakkhu avijjāsambhūtanti vavattheti, cakkhu taṇhāsambhūtanti vavattheti, cakkhu kammasambhūtanti vavattheti, cakkhu āhārasambhūtanti vavattheti, cakkhu catunnaṁ mahābhūtānaṁ upādāyāti vavattheti, cakkhu uppannanti vavattheti, cakkhu samudāgatanti vavattheti.

ps1.1:382.3 Cakkhu ahutvā sambhūtaṁ, hutvā na bhavissatīti vavattheti.

ps1.1:382.4 Cakkhuṁ antavantato vavattheti, cakkhu addhuvaṁ asassataṁ vipariṇāmadhammanti vavattheti, cakkhu aniccaṁ saṅkhataṁ paṭiccasamuppannaṁ khayadhammaṁ vayadhammaṁ virāgadhammaṁ nirodhadhammanti vavattheti.

ps1.1:382.5 Cakkhuṁ aniccato vavattheti, no niccato;

ps1.1:382.6 dukkhato vavattheti, no sukhato;

ps1.1:382.7 anattato vavattheti, no attato;

ps1.1:382.8 nibbindati, no nandati;

ps1.1:382.9 virajjati, no rajjati;

ps1.1:382.10 nirodheti, no samudeti;

ps1.1:382.11 paṭinissajjati, no ādiyati.

ps1.1:382.12 Aniccato vavatthento niccasaññaṁ pajahati, dukkhato vavatthento sukhasaññaṁ pajahati, anattato vavatthento attasaññaṁ pajahati, nibbindanto nandiṁ pajahati, virajjanto rāgaṁ pajahati, nirodhento samudayaṁ pajahati, paṭinissajjanto ādānaṁ pajahati.

ps1.1:382.13 Evaṁ cakkhuṁ ajjhattaṁ vavattheti.