ps1.1:240.1 Evarūpānaṁ sīlānaṁ saṁvarapārisuddhi adhisīlaṁ.
BAGIAN 240
ps1.1:240.2 Saṁvarapārisuddhiyā ṭhitaṁ cittaṁ avikkhepaṁ gacchati, avikkhepapārisuddhi adhicittaṁ.
ps1.1:240.3 Saṁvarapārisuddhiṁ sammā passati, avikkhepapārisuddhiṁ sammā passati.
ps1.1:240.4 Dassanapārisuddhi adhipaññā.
ps1.1:240.5 Yo tattha saṁvaraṭṭho, ayaṁ adhisīlasikkhā.
ps1.1:240.6 Yo tattha avikkhepaṭṭho, ayaṁ adhicittasikkhā.
ps1.1:240.7 Yo tattha dassanaṭṭho, ayaṁ adhipaññāsikkhā.
ps1.1:240.8 Imā tisso sikkhāyo āvajjanto sikkhati, jānanto sikkhati, passanto sikkhati, paccavekkhanto sikkhati, cittaṁ adhiṭṭhahanto sikkhati, saddhāya adhimuccanto sikkhati, vīriyaṁ paggaṇhanto sikkhati, satiṁ upaṭṭhapento sikkhati, cittaṁ samādahanto sikkhati, paññāya pajānanto sikkhati, abhiññeyyaṁ abhijānanto sikkhati, pariññeyyaṁ parijānanto sikkhati pahātabbaṁ pajahanto sikkhati, sacchikātabbaṁ sacchikaronto sikkhati, bhāvetabbaṁ bhāvento sikkhati.
ps1.1:240.9 Taṁ ñātaṭṭhena ñāṇaṁ pajānanaṭṭhena paññā.
ps1.1:240.10 Tena vuccati—
ps1.1:240.11 “sutvāna saṁvare paññā sīlamaye ñāṇaṁ”.
ps1.1:240.12 Sīlamayañāṇaniddeso dutiyo.