pe9:5.1 Tattha ye diṭṭhicaritā sattā, te dvidhā mudindriyā ca tikkhindriyā ca.
BAGIAN 5
pe9:5.2 Tattha ye diṭṭhicaritā sattā tikkhindriyā sukhena paṭinissajjanti, khippañca abhisamenti, tena vuccati “khippābhiññā sukhā paṭipadā”ti.
pe9:5.3 Tattha ye diṭṭhicaritā sattā mudindriyā paṭhamaṁ tikkhindriyaṁ upādāya dandhataraṁ abhisamenti, te sukhena paṭinissajjanti, dandhañca abhisamenti.
pe9:5.4 Tena vuccati “sukhā paṭipadā dandhābhiññā”ti.
pe9:5.5 Tattha taṇhācaritā sattā dvidhā tikkhindriyā ca mudindriyā ca.
pe9:5.6 Tattha ye taṇhācaritā sattā tikkhindriyā dukkhena paṭinissajjanti, khippañca abhisamenti.
pe9:5.7 Tena vuccati “dukkhā paṭipadā khippābhiññā”ti.
pe9:5.8 Tattha ye taṇhācaritā sattā mudindriyā paṭhamaṁ tikkhindriyaṁ upādāya dandhataraṁ abhisamenti, te dukkhena paṭinissajjanti, dandhañca abhisamenti.
pe9:5.9 Tena vuccati “dukkhā paṭipadā dandhābhiññā”ti.
pe9:5.10 Imā catasso paṭipadāyo apañcamā achaṭṭhā.
pe9:5.11 Ye hi keci nibbutā nibbāyissanti vā imāhi catūhi paṭipadāhi anaññāhi ayaṁ paṭipadācatukkena kilese niddisati.
pe9:5.12 Yā catukkamaggena ariyadhammesu niddisitabbā, ayaṁ vuccati sīhavikkīḷito nāma nayo.