pe8:90.1 Tattha katamo lakkhaṇo?
BAGIAN 90
pe8:90.2 Sīlakkhandhe vutte sabbe tayo khandhā vuttā bhavanti, sīlameva hi selopamatā yathā selo sabbapaccatthikehi akaraṇīyo evaṁ taṁ cittaṁ sabbakilesehi na kampatīti, ayaṁ amoho.
pe8:90.3 Virattaṁ rajanīyesūti ayaṁ alobho.
pe8:90.4 Kopaneyye na kuppatīti ayaṁ adoso.
pe8:90.5 Tattha paññā amoho kusalamūlaṁ, alobho alobhoyeva, adoso adosoyeva.
pe8:90.6 Imehi tīhi kusalamūlehi sekkhabhūmiyaṁ ṭhito asekkhamaggaṁ uppādeti.
pe8:90.7 Sekkhabhūmi sampattikammadhamme uppādeti, sā ca sammāvimutti, yañca vimuttirasañāṇadassanaṁ ime dasa asekkhānaṁ arahattaṁ dhammā.
pe8:90.8 Tattha aṭṭhaṅgikena maggena catubbidhā bhāvanāpi labbhati.
pe8:90.9 Sīlabhāvanā kāyabhāvanā cittabhāvanā paññābhāvanā ca.
pe8:90.10 Tattha sammākammantena sammāājīvena ca kāyo bhāvito.
pe8:90.11 Sammāvācāya sammāvāyāmena ca sīlaṁ bhāvitaṁ.
pe8:90.12 Sammāsaṅkappena sammāsamādhinā ca cittaṁ bhāvitaṁ.
pe8:90.13 Sammādiṭṭhiyā sammāsatiyā ca paññā bhāvitā.
pe8:90.14 Imāya catubbidhāya bhāvanāya dve dhammā bhāvanāpāripūriṁ gacchanti cittaṁ paññañca.
pe8:90.15 Cittaṁ bhāvanāya samatho, paññā bhāvanāya vipassanā.
pe8:90.16 Tattha paññā avijjāpahānena cittaṁ upakkilesehi amissīkatanti.
pe8:90.17 Paññā bhāvanāya cittabhāvanaṁyeva paripūreti.
pe8:90.18 Evaṁ yassa subhāvitaṁ cittaṁ kuto taṁ dukkhamessatīti.
pe8:90.19 Api ca kho pana tassa āyasmato abyāpādadhātu adhimuttā, na so petaṁ samāpanno tassa saṅkhāpahāraṁ deti, saṅkhāvitakkite sarīre dukkhaṁ na vediyati, ayaṁ suttattho.