pe8:250.1 Tattha yo anusotagāmī ayaṁ kāme sevati.
BAGIAN 250
pe8:250.2 Pāpañca kammaṁ karoti yāva kāme paṭisevati.
pe8:250.3 Idaṁ lobho akusalamūlaṁ, soyeva taṇhā, so tehi kāmehi vuyhati anusotagāmīti vuccati.
pe8:250.4 Yo puggalo tāhi gamito tappaccayā tassa hetu akusalakammaṁ karoti kāyena ca vācāya ca, ayaṁ vuccati pāpakammaṁ karotīti.
pe8:250.5 Tassa tīṇi sotāni sakkāyadiṭṭhi vicikicchā sīlabbataparāmāso.
pe8:250.6 Imehi tīhi sotehi tividhadhātuyaṁ uppajjati kāmadhātuyaṁ rūpadhātuyaṁ arūpadhātuyaṁ.
pe8:250.7 Tena paṭipakkhena yo kāme na paṭisevati.
pe8:250.8 Yo sīlavataṁ na parāmasati.
pe8:250.9 Yo sakkāyadiṭṭhīnaṁ pahānāya kāmesu yathābhūtaṁ ādīnavaṁ passati.
pe8:250.10 Yena ca te dhamme paṭisevati.
pe8:250.11 Yañca tappaccayā tiṭṭhati brāhmaṇoti arahaṁ kira.
pe8:250.12 Tattha arahaṁ tassa pāraṅgato hoti, pāraṅgatassa thale tiṭṭhati sopādisesā nibbānadhātu.
pe8:250.13 Anusotagāminīti dassanappahātabbānaṁ saṁyojanānaṁ appahānamāha.
pe8:250.14 Paṭisotagāminīti phale diṭṭhekaṭṭhānañca kilesānaṁ pahānamāha, ṭhitattena pañcannaṁ orambhāgiyānaṁ saṁyojanānaṁ pahānamāha.
pe8:250.15 Tattha anusotagāminā maggarūpimāha.
pe8:250.16 Paṭisotagāminā ṭhitattena ca maggamitimāha.
pe8:250.17 Pāraṅgatena sāvakā asekkhā ca sammāsambuddhā ca vuttā.
pe8:250.18 Anusotagāminā sakkāyasamudayagāminiṁ paṭipadamāha.
pe8:250.19 Paṭisotagāminā ṭhitattena sakkāyanirodhagāminiṁ paṭipadamāha.
pe8:250.20 Pāraṅgatena dasa asekkhā arahantā dhammā vuttā.
pe8:250.21 Ayaṁ suttattho.