pe8:25.1 Tattha katamo vicayo.
BAGIAN 25
pe8:25.2 Abhijjhā kāmataṇhā rūpataṇhā bhavataṇhā.
pe8:25.3 Yaṁ vā pana kiñci ajjhosānagataṁ sāsavā abhijjhitassa mettānupassiya yo anatthaṁ carati.
pe8:25.4 Tattha yo byāpādaṁ uppādeti, acari carissatīti.
pe8:25.5 Evaṁ nava āghātavatthūni kattabbāni, tassevaṁ byāpādānupassissa kileso yo paridāho kāyakilamatho akammaniyatā middhaṁ.
pe8:25.6 Cittānupassissa paṭighātena khiyanā, idaṁ thinamiddhaṁ.
pe8:25.7 Tattha adhikaraṇaavūpasamo, idaṁ uddhaccaṁ.
pe8:25.8 Yaṁ kiṁ kasathamīti idaṁ kukkuccaṁ.
pe8:25.9 Yaṁ yathā idaṁ santīraṇaṁ, ayaṁ vicikicchā.
pe8:25.10 Tattha avijjā ca taṇhā ca atthi, idaṁ pariyuṭṭhānaṁ.
pe8:25.11 Āvaraṇaṁ nīvaraṇaṁ chadanaṁ upakkileso ca atthi, idaṁ kāmacchando kāmarāgapariyuṭṭhānassa padaṭṭhānaṁ.
pe8:25.12 Byāpādo byāpādapariyuṭṭhānassa padaṭṭhānaṁ.
pe8:25.13 Thinamiddhaṁ thinamiddhapariyuṭṭhānassa padaṭṭhānaṁ.
pe8:25.14 Uddhaccakukkuccaṁ avijjāpariyuṭṭhānassa padaṭṭhānaṁ.
pe8:25.15 Vicikicchā vicikicchāpariyuṭṭhānassa padaṭṭhānaṁ.
pe8:25.16 Kāmarāgapariyuṭṭhānaṁ anusayasaṁyojanassa padaṭṭhānaṁ.
pe8:25.17 Byāpādapariyuṭṭhānaṁ paṭighasaṁyojanassa padaṭṭhānaṁ.
pe8:25.18 Thinamiddhapariyuṭṭhānaṁ mānasaṁyojanassa padaṭṭhānaṁ.
pe8:25.19 Avijjāpariyuṭṭhānañca vicikicchāpariyuṭṭhānañca diṭṭhisaṁyojanassa padaṭṭhānaṁ.