pe8:188.1 Tattha katamaṁ saṅkilesabhāgiyaṁ nibbedhabhāgiyaṁ ca suttaṁ?
BAGIAN 188
pe8:188.2 Na taṁ daḷhaṁ bandhanamāhu dhīrāti gāthā.
pe8:188.3 Kena kāraṇena taṁ bandhanaṁ daḷhaṁ?
pe8:188.4 Catūhi kāraṇehi issariyena sakkā mocetuṁ dhanena vā aññena vā yācanāya vā parāyanena vā.
pe8:188.5 Yesu ca ayaṁ rāgo maṇikuṇḍalesu puttesu dāresu ca yā apekkhā, idamassa cetasikabandhanaṁ.
pe8:188.6 Taṁ na sakkā issariyena vā dhanena vā aññena vā yācanāya vā parāyanena vā mocetuṁ.
pe8:188.7 Na ca tattha koci atthi pāṭibhogo.
pe8:188.8 Iminā bandhanato mocayitthāti devo vā manusso vā tadidaṁ bandhanaṁ rāgānusayena ca chasu bāhiresu ca āyatanesu bandhati.
pe8:188.9 Rūpesu rūpataṇhā bandhati, yāva dhammesu dhammataṇhā.
pe8:188.10 Yo idha loke bandho paralokasmiṁ bandho nīyati.
pe8:188.11 So bandho jāyati, bandho mīyati.
pe8:188.12 Bandho asmā lokā paraṁ lokaṁ gacchati.
pe8:188.13 Na sakkā mocetuṁ aññatra ariyamaggena imañca bandhanaṁ.
pe8:188.14 Maraṇabhāvañca upapattibhāvañca bhayato viditvā chandarāgaṁ pajahati.
pe8:188.15 So imaṁ chandarāgaṁ pajahitvā atikkamati.
pe8:188.16 Ayañca loko ito paraṁ dutiyo.