pe6:9.1 Tattha katamā <b>avijjā</b>?
BAGIAN 9
pe6:9.2 Yaṁ catūsu ariyasaccesu aññāṇanti vitthārena yathā so pāṇasajjesu kathaṅkathā kātabbaṁ.
pe6:9.3 Tattha katamaṁ viññāṇaṁ?
pe6:9.4 Cha viññāṇakāyā vedanā saññā cetanā phasso manasikāro, idaṁ nāmaṁ.
pe6:9.5 Tattha katamaṁ rūpaṁ?
pe6:9.6 Cātumahābhūtikaṁ catunnaṁ mahābhūtānaṁ upādāyarūpassa paññattiṁ.
pe6:9.7 Iti purimakañca nāmaṁ idañca rūpaṁ tadubhayaṁ nāmarūpanti vuccati.
pe6:9.8 Tattha chaḷāyatananti cha ajjhattikāni āyatanāni, cakkhu ajjhattikaṁ āyatanaṁ yāva mano ajjhattikaṁ āyatanaṁ.
pe6:9.9 Phassoti cha phassakāyā cakkhusamphasso yāva manosamphassoti phasso.
pe6:9.10 Cha vedanākāyā vedanā.
pe6:9.11 Taṇhāti cha taṇhākāyā taṇhā.
pe6:9.12 Upādānanti cattāri upādānāni kāmupādānaṁ diṭṭhupādānaṁ sīlabbatupādānaṁ attavādupādānanti upādānaṁ.
pe6:9.13 Bhavoti tayo bhavā kāmabhavo rūpabhavo arūpabhavo.
pe6:9.14 Tattha katamā jāti?
pe6:9.15 Yā paṭhamaṁ khandhānaṁ paṭhamaṁ dhātūnaṁ paṭhamaṁ āyatanānaṁ uppatti jāti sañjāti okkanti abhinibbatti khandhānaṁ pātubhāvo, ayaṁ jāti.
pe6:9.16 Tattha katamā jarā?
pe6:9.17 Jarā nāma yaṁ taṁ khaṇḍiccaṁ pāliccaṁ valittacatā pavivittaṁ catunnaṁ mahābhūtānaṁ vivaṇṇataṁ bhaggo taṁ jarā hīyanā pahīyanā āyuno hāni saṁhāni indriyānaṁ paribhedo upanāho paripāko, ayaṁ jarā.
pe6:9.18 Tattha katamaṁ maraṇaṁ?
pe6:9.19 Maraṇaṁ nāma yaṁ tasmiṁ tasmiṁ sattanikāye tesaṁ tesaṁ sattānaṁ cuti cavanatā maraṇaṁ kālaṅkiriyā uddhumātakānaṁ bhedo kāyassa jīvitindriyassa upacchedo, idaṁ maraṇaṁ.
pe6:9.20 Iti purimikā ca jarā idañca maraṇaṁ tadubhayaṁ jarāmaraṇaṁ.