pe5:72.1 Puna rāgasahagatassa kammassa vipākena paṭisandhimhi bhavo nibbattati, taṁ kammassa sabbaṁ abhiniviṭṭhaṁ aññāṇavasena ponobhavikā saṅkhārāti vuccanti, evampi avijjāpaccayā saṅkhārā atthi.
BAGIAN 72
pe5:72.2 Puna pañcasu ye ca sekkhā puggalā, ye ca asaññisamāpattiṁ samāpannā, ye ca bhavagatā, ye ca antogatāyeva saṁsedajā, ye ca vā pana añño hi koci anāgāmibhūtā na cetenti na ca patthenti, tesaṁ kiṁ paccayā saṅkhārā.
pe5:72.3 Puna rāgā atthi tesaṁ saṅkhārāni upādānāni cittamanussarantiyeva avipakkavipākasamūhatā asamucchinnapaccayā tesaṁ puna ca gato bhavati.
pe5:72.4 Evampi hi avijjāpaccayā saṅkhārā.
pe5:72.5 Puna sā te na upādānā napi saṅkhārā atthi, puna tesaṁ satta anusayā asamūhatā asamucchinnā tadārammaṇaṁ bhavati.
pe5:72.6 Viññāṇassa patiṭṭhāya viññāṇapaccayā nāmarūpaṁ.
pe5:72.7 Evampi avijjāpaccayā saṅkhārā.
pe5:72.8 Puna sā yaṁ kiñci kammaṁ ācayagāmi sabbaṁ taṁ avijjāvasena abhisaṅkhariyati taṇhāvasena ca allīyati aññāṇavasena ca tattha ādīnavampi na jānāti.
pe5:72.9 Tadeva viññāṇabījaṁ bhavati, sāyeva taṇhāsineho bhavati.
pe5:72.10 Sāyeva avijjā sammohoti.
pe5:72.11 Evampi avijjāpaccayā saṅkhārā vattabbā.
pe5:72.12 Iti imehi ākārehi avijjā saṅkhārānaṁ paccayo.