pe5:51.1 Tassa kāmāsavāpi cittaṁ vimuccati, bhavāsavāpi cittaṁ vimuccati, avijjāsavāpi cittaṁ vimuccatīti pahānapaññattiṁ paññapeti.
BAGIAN 51
pe5:51.2 Taṇhā yassa purakkhatā paññā parivattati gāthā manāpapaññattiṁ paññapeti.
pe5:51.3 Evaṁ pana manāpapaññattīti ekadhammaṁ bhagavā paññapeti.
pe5:51.4 Na hi taṇhā dukkhasamudayoti kāretvā sabbattha taṇhāsamudayo niddisitabbo.
pe5:51.5 Yathā uppannaṁ kāmavitakkaṁ nādhivāseti vinodeti pajahatīti paṭikkhepapaññatti.
pe5:51.6 Evaṁ sabbesaṁ dhammānaṁ kusalānañca akusalānañca yañcassa dhammakkhettaṁ bhavati, so ceva dhammo tattha pavattati.
pe5:51.7 Tadavasiṭṭhā dhammā tassānuvattakā honti.
pe5:51.8 Sā duvidhā paññatti—
pe5:51.9 parādhīnapaññatti ca sādhīnapaññatti ca.
pe5:51.10 Katamā sādhīnapaññatti?
pe5:51.11 Samādhiṁ, bhikkhave, bhāvetha, samāhito, bhikkhave, bhikkhu yathābhūtaṁ pajānāti.
pe5:51.12 “Rūpaṁ aniccan”ti yathābhūtaṁ pajānāti, ayaṁ sādhīnapaññatti parādhīnapaññatti ca, sā paññatti paññāya ca sīlassa ca, yathā cattāri jhānāni bhāvetha.
pe5:51.13 Tassa atthi samādhindriyaṁ mudūni cattāri indriyāni tāni catuparādhīnāni, tīṇi aveccappasādeti parādhīnaṁ samādhindriyaṁ cattāri indriyāni parādhīnāti catūsu ariyasaccesu aparādhīnaṁ paññindriyaṁ satipaṭṭhānesu sammappadhānesu vīriyindriyaṁ.
pe5:51.14 Iti sake padaṭṭhāne sake khettasādhīno so dhammo, so ca tattha paññāpetabbo.
pe5:51.15 Tassa paṭipakkhā nighāto niddisitabbo.
pe5:51.16 Etthāyaṁ anekākārapaññatti kena kāraṇena ayaṁ dhammo paññattoti.
pe5:51.17 Ayaṁ vuccate paññatti.