5. Hāravibhaṅgapañcamabhūmi

pe5:28.1 Yathā manusso purimassa padassa padaṭṭhānaṁ alabhanto dutiyaṁ padaṁ uddharati, so pacchānupadaṁ saṁharati.

pe5:28.2 Yadi pana yo na dutiyapadassa padaṭṭhānaṁ labhati, aparaṁ padaṁ uddharati.

pe5:28.3 Tassa yo ceso paccayo bhavati.

pe5:28.4 Evaṁ dhammo kusalo vā akusalo vā abyākato vā padaṭṭhānaṁ alabhanto na pavattati.

pe5:28.5 Yathā payuttassa dhammassa yonilābho, ayaṁ vuccati padaṭṭhāno hāro.