pe2:49.1 Tattha saddhindriyena sabbaṁ vicikicchitaṁ pajahati, paññindriyena udayabbayaṁ passati, samādhindriyena cittaṁ ekodi karoti vīriyindriyena ārabhati.
BAGIAN 49
pe2:49.2 So imehi pañcahi indriyehi saddhānusārī aveccappasāde nirato anantariyaṁ samādhiṁ uppādeti.
pe2:49.3 Indriyehi suddhehi dhammānusārī appaccayatāya anantariyaṁ samādhiṁ uppādeti.
pe2:49.4 So “idaṁ dukkhan”ti yathābhūtaṁ pajānāti.
pe2:49.5 Saccāni idaṁ dassanabhāgiyaṁ suttaṁ.
pe2:49.6 Tassa pañcannaṁ orambhāgiyānaṁ saṁyojanānaṁ tīṇi saṁyojanāni dassanapahātabbāni sabbena sabbaṁ pahīnāni dve puggalakatāni.
pe2:49.7 Tattha tīṇi akusalamūlāni bhāvanāpahātabbāni uparikkhittāni cha bhave nibbattenti.
pe2:49.8 Tattha tesu abhijjhāya ca byāpādesu tanukatesu cha bhavā parikkhayā mariyādaṁ gacchanti, dve bhavā avasiṭṭhā.
pe2:49.9 Tassa abhijjhā ca byāpādo ca sabbena sabbaṁ parikkhīṇā honti.
pe2:49.10 Eko bhavo avasiṭṭho hoti.
pe2:49.11 So ca mānavasena nibbatteti.
pe2:49.12 Kiñcāpi ettha aññepi cattāro kilesā rūparāgo bhavarāgo avijjā uddhaccaṁ ketusmimānabhūtā nappaṭibalā asmimānaṁ vinivattetuṁ, sabbepi te asmimānassa pahānaṁ ārabhate.
pe2:49.13 Khīṇesu na ca tesu idamuttaridassanabhūmiyaṁ pañcasu sekkhapuggalesu tīsu ca paṭippannakesu dvīsu ca phalaṭṭhesu bhāvanābhāgiyaṁ suttaṁ.
pe2:49.14 Taduttari asekkhabhāgiyasuttaṁ, katthaci bhūmi nipīḷiyati.
pe2:49.15 Idañca pañcamaṁ suttaṁ.
pe2:49.16 Tiṇṇaṁ puggalānaṁ desitaṁ puthujjanassa sekkhassa asekkhassa saṅkilesabhāgiyaṁ vāsanābhāgiyaṁ.
pe2:49.17 Puthujjanassa dassanabhāgiyaṁ.
pe2:49.18 Bhāvanābhāgiyaṁ pañcannaṁ sekkhānaṁ.
pe2:49.19 Yaṁ paṭhamaniddiṭṭhaṁ asekkhabhāgiyaṁ sabbesaṁ arahantānaṁ.
pe2:49.20 Sā pana pañcavidhā sattavīsaākāre pariyesitabbaṁ.
pe2:49.21 Etesu tassa gatīnaṁ tato uttari.
pe2:49.22 Tañca kho saṅkhepena paññāsāya ākārehi sampatati, ye paññāsa ākārā sāsane niddiṭṭhā, te saṅkhipiyantā dasahi ākārehi patanti.
pe2:49.23 Ye ariyasaccaṁ nikkhepena ṭhite saṅkhipiyattā aṭṭhasu ākāresu patanti.
pe2:49.24 Catūsu ca sādhāraṇesu suttesu yā hārasampātassa bhūmi, te saṅkhipiyantā pañcasu suttesu patanti.
pe2:49.25 Saṅkilesabhāgiye vāsanābhāgiye bhāvanābhāgiye nibbedhabhāgiye asekkhabhāgiye ca.
pe2:49.26 Te saṅkhipiyantā catūsu suttesu patanti.
pe2:49.27 Saṅkilesabhāgiye vāsanābhāgiye nibbedhabhāgiye asekkhabhāgiye ca.
pe2:49.28 Te saṅkhipiyamānā tīsu suttesu patanti, puthujjanabhāgiye sekkhabhāgiye asekkhabhāgiye ca.
pe2:49.29 Te saṅkhipiyantā dvīsu suttesu patanti nibbedhabhāgiye ca pubbayogabhāgiye ca.
pe2:49.30 Yathā vuttaṁ bhagavatā dve atthavase sampassamānā tathāgatā arahanto sammāsambuddhā dhammaṁ desenti suttaṁ geyyaṁ …pe…
pe2:49.31 satthā pubbayogasamannāgate appakasirena maññamānā vasiyanti pubbayogā ca bhavissanti santānaṁ maññamānādharāya.
pe2:49.32 Tattha paññāvemattataṁ attano samanupassamānena aṭṭhavidhe suttasaṅkhepe, yattha yattha sakkoti, tattha tattha yojetabbaṁ.
pe2:49.33 Tattha tattha yojetvā suttassa attho niddisitabbo.
pe2:49.34 Na hi sati vedanā mano dhāretvā sakkā yena kenaci suttassa attho yathābhūtaṁ niddisituṁ.