8. Pasūrasuttaniddesa

mnd8:33.1 <b>Etampi disvā virame kathojjan</b>ti.

mnd8:33.2 <b>Etampi disvā</b>ti etaṁ ādīnavaṁ disvā passitvā tulayitvā tīrayitvā vibhāvayitvā vibhūtaṁ katvā diṭṭhikalahesu diṭṭhibhaṇḍanesu diṭṭhiviggahesu diṭṭhivivādesu diṭṭhimedhagesūti—

mnd8:33.3 <b>etampi disvā virame kathojjan</b>ti.

mnd8:33.4 <b>Kathojja</b>ṁ vuccati kalaho bhaṇḍanaṁ viggaho vivādo medhagaṁ.

mnd8:33.5 Atha vā <b>kathojjan</b>ti anojavantī sā kathā kathojjaṁ na kareyya,

mnd8:33.6 kalahaṁ na kareyya,

mnd8:33.7 bhaṇḍanaṁ na kareyya,

mnd8:33.8 viggahaṁ na kareyya,

mnd8:33.9 vivādaṁ na kareyya,

mnd8:33.10 medhagaṁ na kareyya,

mnd8:33.11 kalahabhaṇḍanaviggahavivādamedhagaṁ pajaheyya vinodeyya byantiṁ kareyya anabhāvaṁ gameyya,

mnd8:33.12 kalahabhaṇḍanaviggahavivādamedhagā ārato assa virato paṭivirato nikkhanto nissaṭo vippayutto visaññutto vimariyādikatena cetasā vihareyyāti—

mnd8:33.13 etampi disvā virame kathojjaṁ.