7. Tissametteyyasuttaniddesa

mnd7:32.1 <b>Yaso kitti ca yā pubbe, hāyate vāpi tassa sā</b>ti.

mnd7:32.2 Katamo <b>yaso</b>?

mnd7:32.3 Idhekacco pubbe samaṇabhāve sakkato hoti garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānaṁ—

mnd7:32.4 ayaṁ yaso.

mnd7:32.5 Katamā <b>kitti</b>?

mnd7:32.6 Idhekacco pubbe samaṇabhāve kittivaṇṇagato hoti paṇḍito viyatto medhāvī bahussuto cittakathī kalyāṇapaṭibhāno—

mnd7:32.7 suttantikoti vā vinayadharoti vā dhammakathikoti vā āraññikoti vā piṇḍapātikoti vā paṁsukūlikoti vā tecīvarikoti vā sapadānacārikoti vā khalupacchābhattikoti vā nesajjikoti vā yathāsanthatikoti vā

mnd7:32.8 paṭhamassa jhānassa lābhīti vā dutiyassa jhānassa lābhīti vā tatiyassa jhānassa lābhīti vā catutthassa jhānassa lābhīti vā ākāsānañcāyatanasamāpattiyā lābhīti vā viññāṇañcāyatanasamāpattiyā lābhīti vā ākiñcaññāyatanasamāpattiyā lābhīti vā nevasaññānāsaññāyatanasamāpattiyā lābhīti vā, ayaṁ kittīti—

mnd7:32.9 yaso kitti ca yā pubbe.