mnd1:27.1 <b>Sappasseva padā siro</b>ti.
BAGIAN 27
mnd1:27.2 <b>Sappo</b> vuccati ahi.
mnd1:27.3 Kenaṭṭhena sappo?
mnd1:27.4 Saṁsappanto gacchatīti sappo;
mnd1:27.5 bhujanto gacchatīti bhujago;
mnd1:27.6 urena gacchatīti urago;
mnd1:27.7 pannasiro gacchatīti pannago;
mnd1:27.8 sirena supatīti sarīsapo;
mnd1:27.9 bile sayatīti bilāsayo;
mnd1:27.10 guhāyaṁ sayatīti guhāsayo;
mnd1:27.11 dāṭhā tassa āvudhoti dāṭhāvudho;
mnd1:27.12 visaṁ tassa ghoranti ghoraviso;
mnd1:27.13 jivhā tassa duvidhāti dvijivho;
mnd1:27.14 dvīhi jivhāhi rasaṁ sāyatīti dvirasaññū.
mnd1:27.15 Yathā puriso jīvitukāmo amaritukāmo sukhakāmo dukkhapaṭikkūlo pādena sappasiraṁ vajjeyya vivajjeyya parivajjeyya abhinivajjeyya;
mnd1:27.16 evamevaṁ sukhakāmo dukkhapaṭikkūlo kāme vajjeyya vivajjeyya parivajjeyya abhinivajjeyyāti—
mnd1:27.17 sappasseva padā siro.